صمد بهرنگي منظومه سي
صمد بهرنگي منظومه سي
قوي افسانه لشسين «صمد بهرنگي»،
انساني ياشادار مسلك چلنگي.
قوي عاشيقلار قوشسون آدينا داستان،
اوغوللار دينله سين سني هر زامان.
عشقينله اوره كلر قوي آلوولانسين،
آديني چكنده دوشمان اودلانسين.
ترپنسين يئريندن قوي بؤيوك تبريز،
اؤز باشيناليقدان داي قالماسين ايز.
قوي يانسين اودلارا شعريم، داستانيم،
حؤكمدن قورتولسون آذربايجانيم.
دوشمه سين وطنيم هيچ زامان اله،
گؤتور سازي سؤيله سن صمد ائله،
سنين خاطيره نله بير يئره دولسون.
قدرتين گؤسترسين تا آزاد اولسون.
آنالار اوره گي قوربان هزمينه،
او شجاعتينه، بؤيوك عزمينه.
سنه قوربان منيم ناغيليم بوتون،
سحرلر آخشاملار شفقده گؤرون.
آغالارين جاني دوشسون قورخويا،
ائل مينلر، اون مينلر گلسينلر هايا.
گؤزونده اوخودم عشقيني يوردون،
كؤنلومده چالخانان آتشي دويدون.
ازلدن وورولدوق آذربايجانا،
كؤنلوموز چيرپيندي، جان وئردي اونا.
قوشا ووردو هر دم اوره كلريميز،
دوشوندوردو بيزي ديلكلريميز.
هاميميز بير وطن، بير ائل ائولادي،
وطنه باغلانميش قهرمان آدي.
آتالار سؤزو
توپلاياني: ابوالقاسيم حسين زاده
كؤچوره ني: جاويد كبيري
ناشر: نشر اختر
چاپ نؤبه سي: ايكينجي
عصيرلر بويو اؤز طراوتيني قورويوب ساخلايان توكنمز بو سؤز خزينه ميز بارده ده اؤلكه ميزده اونلارجا كتاب ايشيق اوزوگؤرموش و بيزي اولدوقجا سئوينديرميشدير. بو كتابين باشقا مزيتي اوندان عبارت ديركي، اثر موضوع اعتباري ايله قلمه آلينميشدير. اينديسه بيتگي لر باره ده وئريلن آتالار سؤزو اؤرنك لري ايله سيزي تانيش ائديريك.
ë آغاج بار وئره نده باشيني آشاغي ديكر.
ë آغاج ديبيندن سو ايچر.
ë آغاج اييلدي ـ سيندي،
ë ايگيد اييلدي ـ اؤلدو.
ë آغاج اكه نين عؤمرو اوزون اولار.
ë آغاج كؤكلري ايله ياشار،
ë انسان دوستلاري ايله!
ë آغاج كؤتويوندن قورويار.
ë آغاج ميوه ني ديه نه قدر بؤيودر.
ë آغاج ميوه سي ايله،
ë انسان امگي ايله تانينار!
ë آغاجي قورد ايچيندن يئيه ر.
ë آغاجين كؤكو تورپاقدادير،
ë انسانين كؤكو ائلده!
ë آغاجين ايكي باشي وار.
ë آغاجلي كندي سئل باسماز (آپارماز).
ë بالتا آغاج كسمه زدي، ساپي آغاج اولماسايدي!
ë بار وئره ن آغاجي كسمه ز لر.
ë بارلي آغاجين باشينا دولانارلار.
ë بؤيوك آغاجين كؤلگه سينده مين قويون ياتار.
ë بؤيوك آغاجين كؤلگه سيده بؤيوك اولار.
ë بوداقدان قوپان آلما آغاجين ديبينه دوشه ر.
ë قورو آغاجين ميوه سي اولماز.
ë اريك آغاجيندان ساز اولماز،
ë گل زورنادان خبر آل.
ë ييخيلان آغاجا بالتا چالان چوخ اولار.
ë كؤلگه ده اولان آغاجين ميوه سي اولماز.
ë ناجنس آغاج دويونلو اولار.
ë سرو آغاجي هر آغاجدان اوجادير.
ë اصلي يوخدور، بو داغيندا بار اولماز.
ë باغ باغبانسيز اولماز، دوه ساربانسيز!
ë باغ بئله، بوستان بئله، تنكلري شله ـ شله!
ë باغا باغ دئييبلر، باخ دئييبلر.
ë باغ سالان بارين يئيه ر.
ë باغا باخ، باريني گؤر.
ë باغا باخ اوزوم اولسون، يئمه يه اوزون اولسون.
ë باغا باخارسان باغ اولار، باخمازسان داغ اولار.
ë باغدا اريك وار يدي، سلام ـ عليك وار ايدي،
ë باغدان اريك قورتاردي سلام ـ عليك قورتاردي.
ë باغدا گوله باخار لار.
ë باغچي باغ ايله، قارپيز تاغي ايله!
ë هئيواسي يوخ، ناري يوخ، قوي دئسينلر شاهبوداغين باغي وار!
ë گئدر باغلار قوراسي، قالار اوزلر قاراسي!
ë باغبان تله سه ر، آرمود واختيندا يئتيشه ر.
ë باغبانين كؤنلو اولسا، نه گليب باغدا پايا؟!
ë باغبانين كار واختيدير.
ë كاميل باغبان چكر باغين صفاسين!
ë بوستان پئييني كيمي شيشمه!
ë بوستانا دادانان اوغرو بيرده گلر!
ë بوستانچييا كليك ساتمازلار.
ë بوستانچي نين كار واختيدير.
ë بوستانچي نين سووقاتي ايري خيار اولار.
ë پئيينينه باخ بوستان آت!
ë يول هميشه بوستان كناريندان دوشمه ز!
ë گول غنچه ده قالماز،
ë سؤز قلبده!
ë گول عزيز ديرسه،
ë گولشن اوندان عزيزدير.
ë گول سولاندا بلبل آغلار.
ë گول تيكانسيز اولماز.
ë گولو ياد ائتديكجه، بلبلون فريادي آرتار.
ë گولون قدريني بولبول بيلر!
ë گولونه باخ، غنچه سيني آل!
ë مرمر اوسته گول بيتمه ز!
ë تيكان اولوب آياغا باتينجا، گول اول ياخايا سانجيل!
ë بيز گولونو درديك، سيز گلابيني چكر سينيز!
ë ميوه كيمي ساراليب، گول كيمي سولوب!
ë ميوه لي آغاجا داش آتان چوخ اولار.
ë ميوه سيز آغاجا داش آتمازلار.
ë ميوه لي آغاجا قوش قونار،
ë ميوه سيني يئدين، باغبانينا رحمت اوخو.
ë قارپيز ـ قووون ياتا ـ ياتا بؤيوير.
ë قارپيز دويوملوق اوچون دئييل، سرينليك اوچوندور!
ë قارپيز يئديگي بس دئييل، هله تومونو داچيرتلايير.
ë قووون چيخدي آت خياري!
ë قوز ـ آغاجي، قيز آغاجي، سينديرارسان يوخ علاجي!
ë اتگيمي قوز ايله دولدورور، باشيما قاپاز وورور!
ë باشيمي يارير، اتگيمه قوز تؤكور!
ë يئل اسيب قوز تؤكولوب.
ë منيمله قوز ـ قوز اويناما!
ë قورا ايكن مؤووج اولدوم.
ë انجير يئمه دين گئتدين، دردين دئمه دين گئتدين.
ë نار آغاجي ـ ايستك آغاجي!
ë نار اوستدن تورپ يئمه زلر!
ë بوغدا اولمايان يئرده، داريني گؤزه تپرلر.
ë بوغدام وار دئمه، آنبارا تؤكمه يينجه! اولاديم وار دئمه، ائولنمه يينجه!
ë سپيلمه يه ن بوغدا گؤيه ر مه ز!
ë اوزاق يئرين بوغداسيندان، ياخين يئرين آرپاسي ياخشيدير.
ë داري چؤره يي خرمنه قدردير.
ë دارييا گيرن دونوز، پاييني اؤزونه قبول ائلر!
ë قوشدان قورخان داري اكمه ز!
ë دني ائللردن، سويو گؤللردن!
ë قوش دنه ييغيلار.
ë ده يير ماندا دني اولمايانا اون وئرمه زلر.
ë اوت كؤكو اوسته بيته ر.
ë اوتا قاتسان آت يئمه ز، اته قاتسان ايت يئمه ز!
ë پامبيق اولسون، بارداندا اولسون!
ë پامبيغا آغ قيزيل دييبلر.